Yeh kya ke sab se beyaan dil ki haalaten karni..

Advertisement Links
 

Yeh kya ke sab se beyaan dil ki haalaten karni,
Faraz tujh ko na aayin muhabbaten karni,

Yeh qurb kya hai ke tu saamne hai aur humen,
Shumaar abhi se judaayi ki saaaten karni,

Koi khudaa ho ke pathar jise bhi hum chahen,
Tamaam umr ussi ki ibaadaten karni,

Sab apne apne qareene se muntazir us ke,
Kisi ko shukr kisi ko shikaayaten karni,

Hum apne dil se hi majboor aur logon ko,
Zara si baat pe barpaa qayamaten karni,

Milen jab un se to mubham si guftaguu karna,
Phir apne aap se sau sau vazaahten karni,

Yeh log kaise magar dushmani nibhaate hain,
Humen to raas na aayin mohabbaten karni,

Kabhi ‘faraz’ naye mausmon me ro dena,
Kabhi talaash puraani rafaaqten karni..