Poetry With Lyrics

Tag: Munir Niazi Shayari

Khawb hote hain dekhne ke liye..

13 December, 2017 | Two Lines Poetry Shayari | ,

 

Khawb hote hain dekhne ke liye,
In main ja kar raha na karo..

 

Ranj-e-firaaqt-e-yaar main ruswaa nahin hua..

10 December, 2017 | Shayari by Poets | ,

 

Ranj e firaaq e yaar main ruswaa nahin hua,
Itna main chup hua ke tamasha nahin hua,

Aesa safar hai jis main koi hamsafar nahin,
Rasta hai is tarah ka ke dekha nahin hua,

Mushkil hua hai rehna humen iss dayaar main,
Barson yahan rahe hain yeh apnaa nahin hua,

Woh kaam shah-e-sheher se ya shehr se hua,
Jo kaam bhi hua yahan acha nahin hua,

Milna tha aik bar usay phir kahin munir,
Aesa main chahta tha pr aesa nahin hua..

 

Qaid main hoon rihaa nahin karta..

10 December, 2017 | Shayari by Poets | ,

Aayina ab juda nahin karta,
Qaid main hoon rihaa nahin karta,

Mustaqil sabr main hai koh-e-giraan,
Naqsh-e-ibrat sadaa nahin karta,

Rang-e-mehfil badalta rehta hai,
Rang koi wafaa nahin karta,

Aish-e-duniya ki justjuu mat kar,
Yeh dafeena mila nahin karta,

Jee main aaye jo kar guzarta hai,
Tu kisi ka kahaa nahin karta,

Ek waaris hamesha hota hai,
Takht khaali raha nahin karta,

Ehd-e-insaaf aa raha hai munir,
Zulm daaayem raha nahin karta..

 

Laazim nahin ke us ko bhi mera khayal ho..

8 December, 2017 | Shayari by Poets | ,

lazim nahin munir niazi

Laazim nahin ke us ko bhi mera khayal ho,
Mera jo haal hai wohi uss ka bhi haal ho,

Koi khabar khushi ki kahin se mile munir,
Iss roz-o-shab main aesa bhi ik din kamaal ho..

Meri saari zindagi ko be-samar us ne kiya..

18 November, 2017 | Shayari by Poets | ,

meri sari zindagi

Meri saari zindagi ko be-samar us ne kiya,
Umar meri thi magar us ko bassar us ne kiya,

Main bohat kamzor tha us mulk main hijrat ke baad,
Pr mujhe us mulk main kamzor-tar us ne kiya,

Sheher main woh moatbar meri gawaahi se hua,
Phir mujhe uss sheher main na-moatbar us ne kiya,

Sheher ko barbaad kar ke rakh diya us ne munir,
Sheher pr yeh zulm mere naam pr us ne kiya..

 

Adab ki baat hai warna munir socho to..

7 October, 2017 | Shayari by Poets, Two Lines Poetry Shayari | ,

 

Adabb ki baat hai warna munir socho to,
Jo shakhss sunta hai woh bol bhi to sakta hai..

 

Yeh kesa nasha hai main kis ajab khumar main hoon..

20 September, 2017 | Shayari by Poets | ,

Yeh kesa nasha hai main kis ajab khumar main hoon,
Tu aa ke ja bhi chuka hai main intezar main hoon,

Makaan hai qabar jise log khud banate hain,
Main apne ghar main hoon ya main kisi mazaar main hoon,

Dar-e-faseel khula ya pahaRR sar se haTta,
Main ab giri hui galiyon ke marg-zar main hoon,

Bas itna hosh hai mujh ko ke ajnabi hain sab,
Ruka hua hoon safar main kisi dayaar main hoon,

Main hoon bhi aur nahin bhi ajeeb baat hai yeh,
Yeh kesa jabr hai main kis ke ikhtiyar main hoon,

Munir dekh shajar chaand aur deewaren,
Havaa khizaan ki hai sar par shab-e-bahaar main hoon..

 

 

4 pages