Poetry With Lyrics

Tag: Hafeez Hoshiarpuri

teri talash mein ham jab kabhi nikalte hain

21 April, 2012 | Shayari by Poets |

teri talash mein ham jab kabhi nikalte hain
ik ajnabi ki tarah raste badalte hain

daraz ho gam-e-hijran k hasil-e-hijran
wo hausale hain jo agosh-e-gam mein palte hain

rawa nahin hai gam-e-ishq is qadar bhi garur
tere bagair bhi dunya k kam chalte hain

kabhi jo had se barhi un ki yad to samjhe
k un k dil mein bhi kuch walwale machalte hain

shab-e-firaq kuch aisi bhi tiragi to nahin
kabhi kabhi sar-e-mizgan charag jalte hain

ab un ke gam se bhi mahrum ho na jayen kabhi
wo jante hain k is gam se dil bahalte hain

kahin dekhi hai shayad teri surat is se pahle bhi

24 April, 2008 | Shayari by Poets |

kahin dekhi hai shayad teri surat is se pahle bhi
k guzri hai mere dil pe ye halat is se pahle bhi

na jane kitne jalwe pesh-rau the tere jalwon k
tujhi se barha ki hai mohabbat is se pahle bhi

sunati hain koi afsana teri sahmagin nazaren
hui hai mujhse gustakhana jurat is se pahle bhi

meri qismat k main is daur mein badnam hun warna
wafadari thi shart-e-admiyat is se pahle bhi

aj unhen kuch is tarah ji khol kar dekha kiye

14 September, 2007 | Urdu Poetry Shayari |

aj unhen kuch is tarah ji khol kar dekha kiye
ek hi lamhe mein jaise umr bhar dekha kiye

dil agar betab hai dil ka muqaddar hai yahi
jis qadar thi ham ko taufiq-e-nazar dekha kiye

khudfaroshana ada thi meri surat dekhna
apne hi jalwe ba-andaz-e-digar dekha kiye

nashanas-e-gam faqat dad-e-hunar dete rahe
ham mata-e-gam ko ruswa-e-hunar dekha kiye

dekhne ka ab ye alam hai koi ho ya na ho
ham jidhar dekha kiye pehron udhar dekha kiye

husn ko dekha hai main ne husn ki khatir ?Hafeez?
warna sab apna hi mear-e-nazar dekha kiye

dipak rag hai chahat apni kahe sunayen tumhen

7 March, 2006 | Shayari by Poets |

dipak rag hai chahat apni kahe sunayen tumhen
ham to sulagte hi rahte hain kyon sulgayen tumhen

tark-e-muhabbat, tark-e-tamanna kar chukne k bad
ham pe ye mushkil an pari hai kaise bulayen tumhen

sannata jab tanhai k zahar mein bujhta hai
wo ghariyan kyon kar katti hain kaise batayen tumhen

jin baton ne pyar tumhara nafrat mein badla
dar lagta hai wo baten bhi bhul na jayen tumhen

1 pages