Poetry With Lyrics

Tag: Daag Dehlvi

phir shab-e-gam ne mujhe shakl dikhai kyon kar

27 May, 2013 | Shayari by Poets |

phir shab-e-gam ne mujhe shakl dikhai kyon kar
ye bala ghar se nikli hui ai kyon kar

tu ne ki gair se meri burai kyon kar
gar na thi dil main to lab par tere ai kyon kar

tum dilazar-o-sitamgar nahin main ne mana
man jayegi ise sari khudai kyon kar

aina dekh k vo kahne lage ap hi ap
aise achon ki kare koi burai kyon kar

kasrat-e-ranj-o-alam sun k ye ilzam mila
itne se dil main hai itnon ki samai kyon kar

dag kal tak to dua ap ki maqbul na thi
aj munh mangi murad ap ne pai kyon kar

lutf vo ishq main paye hain ki ji janta hai

21 March, 2013 | Shayari by Poets |

lutf vo ishq main paye hain ki ji janta hai
ranj bhi itne uthaye hain k ji janta hai

jo zamane k sitam hain vo zamana jane
tune dil itne dukhaye hain k ji janta hai

tum nahin jante ab tak ye tumhare andaz
vo mere dil main samaye hain ki ji janta hai

inhin qadmon ne tumhare inhin qadmon ki qasam
khak main itne milaye hain k ji janta hai

dosti main teri darparda hamare dushman
is qadar apne paraye hain k ji janta hai

gazab kiya, tere vade pe aitabar kiya

7 October, 2012 | Shayari by Poets |

gazab kiya, tere vade pe aitabar kiya
tamam rat qayamat ka intezar kiya

hansa hansa k shab-e-vasl ashk-bar kiya
tasalliyan mujhe de-de k beqarar kiya

ham aise mahv-e-nazara na the jo hosh ata
magar tumhare tagaful ne hoshiyar kiya

fasana-e-shab-e-gam un ko ek kahani thi
kuch aitabar kiya aur kuch na-aitabar kiya

ye kisne jalva hamare sar-e-mazar kiya
k dil se shor utha, hae! beqarar kiya

tarap phir ai dil-e-nadan, k gair kahte hain
akhir kuch na bani, sabr ikhtiyar kiya

bhula bhula k jataya hai unko raz-e-nihan
chipa chipa k mohabbat ko ashkar kiya

tumhen to vada-e-didar ham se karna tha
ye kya kiya k jahan ko ummidavar kiya

ye dil ko tab kahan hai k ho malandesh
unhone vada kiya ham ne aitabar kiya

na puch dil ki haqiqat magar ye kahte hain
vo beqarar rahe jisne beqarar kiya

kuch age davar-e-mahashar se hai ummid mujhe
kuch ap ne mere kahne ka aitabar kiya

khatir se ya lihaz se main man to gaya

27 September, 2012 | Shayari by Poets |

khatir se ya lihaz se main man to gaya
jhuthi qasam se ap ka iman to gaya

dil le k muft kahte hain kuch kam ka nahin
ulti shikayaten rahi ehsan to gaya

ab shay-e-raz-e-ishq go zillaten hui
lekin use jata to diya, jan to gaya

dekha hai butkade main jo ai shekh kuch na kuch
iman ki to ye hai k iman to gaya

Darta hun dekh kar dil-e-be-arazu ko main
sun-san ghar ye kyun na ho mehman to gaya

go namabar se khush na hua par hazar shukr
mujh ko vo mere nam se pahchan to gaya

hosh-o-havas-o-tab-o-tavan “Dag” ja chuk
ab ham bhi jane vale hain saman to gaya

kabe ki hai havas kabhi ku-e-butan ki hai

13 May, 2012 | Shayari by Poets |

kabe ki hai havas kabhi ku-e-butan ki hai
mujh ko khabar nahin meri mitti kahan ki hai

kuch tazgi ho lazzat-e-azar k liye
har dam mujhe talash naye asman ki hai

hasrat baras rahi hai mere mazar se
kahte hain sab ye qabr kisi naujavan ki hai

qasid ki guftagu se tasalli ho kis tarah
chipti nahin vo jo teri zaban ki hai

sun kar mera fasana-e-gam us ne ye kaha
ho jaye jhut sach, yahi khubi bayan ki hai

kyun kar na ae khuld se adam zamin par
mauzun vahin vo khub hai, jo shay jahan ki hai

urdu hai jiska nam hamin jante hain Dag
hindustan main dhum hamari zaban ki hai

Rasm-e-Ulfat Sikha Gaya Koi

26 March, 2012 | Shayari by Poets, Urdu Poetry Shayari |

Rasm-e-Ulfat Sikha Gaya Koi
Dil Ki Duniya Pe Chhaa Gaya Koi

Ta Qayaamat Kisi Tarah Na Bujhay
Aag Aisi Laga Gaya Koi

Dil Ki Duniya Ujri Si Kyun Hai ?
Kia Yahan Se Chala Gaya Koi

Waqt-e-Rukhsat Galay Laga Kar “Daagh”
Hanste Hanste Rula Gaya Koi

Lutf Wo Ishq Mein Paaye Hain Ke Jee Jaanta Hai

2 February, 2012 | Shayari by Poets, Urdu Poetry Shayari |

Lutf Wo Ishq Mein Paaye Hain Ke Jee Jaanta Hai
Ranj Bhee Aisay Uthaaye Hain Ke Jee Jaanta Hai

Jo Zamaanay Ke Sitam Hain Wo Zamaana Jaanay
TU Ne Dil Itnay Sataaye Hain Ke Jee Jaanta Hai

Muskuraatay Howay Wo Majmaa-e-Agyaar Ke Saath
Aaj Yun Bazm Mein Aaye Hain Ke Jee Jaanta Hai

Kaaba-o-Dair Mein Pathra Gayeen Dono Aankhain
Aisay Jalway Nazar Aaye Hain Ke Jee Jaanta Hai

Dosti Mein Teri Dar-Pardah Hamaaray Dushman
Is Qadar Apne Paraaye Hain Ke Jee Jaanta Hai

Daagh-e-Waarafta Ko Ham Aaj Tere Koochay Se
Is Tarah Khainch Ke Laaye Hain Ke Jee Jaanta Hai

6 pages