Poetry With Lyrics

Tag: Ahmad Nadeem Qasmi

gul tera rang chura laye hain gulzaro main

7 July, 2013 | Shayari by Poets |

gul tera rang chura laye hain gulzaro main
jal raha hun bhari barasat ki baucharo main

mujh se katra ke nikal ja magar ai jan-e-haya
dil ki lau dekh raha hun tere rukhsaron main

husn-e-begana-e-ehasas-e-jamal acha hai
gunche khilte hain to bik jate hain bazaron main

zikr karte hain tera mujh se baunavan-e-jafa
charagar phul piro laye hain talvaron main

zaKhm chup sakate hain lekin mujhe fun ki saugandh
Gam ki daulat bhi hai shamil mere shahakaron main

mujh ko nafrat se nahin pyar se maslob karo
main to shamil hun mohabbat ke gunahgaron main

rait se butt na bana ay mere ache fankar

21 May, 2013 | Shayari by Poets |

rait se butt na bana ay mere ache fankar

ek lamhe ko thahar main tujhe patthar la dun
main tere samne ambar laga dun lekin
kaun se rang ka patthar tere kam ayega
surKh patthar jise dil kahti hai bedil duniya
ya wo pattharai hui ankh ka nila patthar
jis main sadiyon k tahayyur ke pare hon dore

kya tujhe ruh ke patthar ki zarurat hogi
jis pe haq bat bhi patthar ki tarah girati hai
ik wo patthar hai jise kahte hain tahazib-e-safed
us k marmar main siyah Khun jhalak jata hai
ik insaf ka patthar bhi to hota hai magar
hath main tesha-e-zar ho to wo hath ata hai

jitne mayar hain is daur ke sab patthar hain
sher bhi raqs bhi tasvir-o-gina bhi patthar
mere ilham tera zahan-e-rasa bhi patthar
is zamane main har fan ka nishan patthar hai
hath patthar hain tere meri zuban patthar hai
rait se butt na bana ay mere ache fankar

Zehno main khayal jal rahe hain

22 April, 2013 | Shayari by Poets |

Zehno main khayal jal rahe hain
sochon ke alav-se lage hain

duniya ki girift main hain saye
ham apna wajud dhundate hain

ab bhuk se koi kya marega
mandi main zamir bik rahe hain

mazi main to sirf dil dukhate the
is daur main zehan bhi dukhe hain

sir katate the kabhi shahanshah
ab log zuban katate hain

ham kaise churain shab se daman
din nikla to saye chal pare hain

lashon ke hujum main bhi hans dain
ab aise bhi hausale kise hain

Jo buraayi mere naam se mansoob huyi

19 September, 2012 | Shayari by Poets, Two Lines Poetry Shayari |

Jo buraayi mere naam se mansoob huyi,
Dosto! kitna bura tha mera acha hona..

Ab tujhe paa ke yeh uljhan hai ke khoye kese

21 March, 2012 | Shayari by Poets, Urdu Poetry Shayari |

Dil mein hum aik hi jazbe ko samoyen kese,
Ab tujhe paa ke yeh uljhan hai ke khoye kese,

Zehen chhalni jo kiya hai, to yeh majboori hai,
Jitne kaante hain, woh talwon mein piroyen kese,

Hum ne maana ke bohat dair hai hashar aney tak,
Chaar janib teri aahat ho to soyen kese,

Kitni hasrat thi, tujhe pass bitha ker rotay,
Ab yeh yeh mushkil hai, tere samne roye keseā€¦!

zist azar hui jati hai

19 September, 2011 | Shayari by Poets |

zist azar hui jati hai
sans talwar hui jati hai

jism bekar hua jata hai
ruh bedar hui jati hai

kan se dil main utarati nahi bat
aur guftar hui jati hai

dhal ke nikli hai haqiqat jab se
kuch purasrar hui jati hai

ab to har zakhm ki munband kali
lab-e-izhar hui jati hai

phul hi phul hain har simt ‘Nadeem’
rah dushwar hui jati hai

Har musarat se sargarani hai

25 April, 2011 | Four Lines Poetry Shayari, Shayari by Poets |

Har musarat se sargarani hai
Kya yehi aalim jawani hai
Aa tujhe aik raaz batlaaon
Mein bhi fani hon, Tu bhi fani hai

4 pages